Како против Грција и удбомафијата

Ако законот предвидува затвор за тие што ќе именуваат кодоши, тогаш како да се изведе доказ дека најугледните луѓе не се во удбашката мрежа?

Како што логиката би се откажала од нас доколку пред неа на некоја друга наука и дадеме предност (Платон, „Филеб“), така и Македонија ќе се откаже од нас доколку на Грција и дадеме предност. А логиката вели Македонија да се одбрани од Грција и од УДБОМАФИЈАТА.

Како да дојдат Македонците до совет и влијание од најугледните, кога кодошот-директор го кодоши професорот д-р Стојан Ристески, плашејќи се за своето место: „Кодошите немаат образ. Тие продолжуваат да си ја вршат ‘работата‘. Кодошењето им станало занимање. Колкумина од нив денес се ‘големи‘ вмровци…?“ (д-р Стојан Ристески, „Моите кодоши“). Како да се изведе доказ дека удбашката мрежа не се најугледните луѓе, кога законот предвидува затвор за тие што ќе именуваат кодоши?„Бидејќи интегритетот на државата го одржува фактот што на народот секогаш му е неопходен совет и влијание од оние најугледните“ (Цицерон, „Закони“).“

А опасноста од враќање на стариот режим е реална. Андраж Зидар („ЛУСТРАЦИЈА, издвојување на противниците на демократијата од јавни функции“, Љубљана 1996, страница 96-97) вели дека лустрацијата не се темели само на хипотетички претпоставки, туку на сосема реална опасност. Тоа го докажува примерот во некогашна Чехословачка. Директивата број ЦБ-002040/03-89 од 28.11.1989, само 11 дена по кадифената револуција и најавата за промена на власта, е конкретно дејство на тајната служба. Директивата ги одредува следните постапки:

„Управување, организација и соработка:

– и покрај постојната функција на власт, на која се наоѓаат агентите и службените контакти во одделни тела, за понатамошни цели да се зачуваат условите за можен трансфер на припадниците на Државна безбедност во нивните структури.

Фактичко оперативно спроведување:

– значително да се зголеми конспиративниот елемент на оперативните дејства на целото подрачје на Државната безбедност;

– повторно да се оцени мрежата на агенти, да се обезбедат нејзина стабилизација и постепено ширење на највисоките функции. Да се потенцира подрачјето на дејствување на највисоките функции. Да се потенцира подрачјето на дејствување на агентите на влијателни и раководни функции. Максимално да се активира работата на агентите, а особено преку дејствување на влијателните агенти;

– да се изведуваат активни мерки за дезинформирање на противникот, со компромитирање на највидните претставници на тие структури пред јавноста и со потенцирање на нивните идеолошки, лични и работни неуспеси;

– најбрзо да се придобијат висококвалитетни влијателни агенти во јавните гласила и помеѓу студентите на високите школи, кои се способни да влијаат на оперативните ситуации во тие структури во корист на Комунистичката партија на Чехословачка.“

Ако победи УДБОМАФИЈАТА, победила Грција (види „Измама и предавство“ во „Нова Македонија“ од 24.3.2010).

Словенците имаат поголем успех од нас со УДБОМАФИЈАТА. Јанша сам денес има рејтинг од околу 28 отсто, а сите три странки што произлегоа од комунистите вкупно имаат околу 18 отсто. Ќе издвојам три работи што според мене беа пресудни, притоа одејќи од помалку важните кон најважните.

Во аферата „секс со пци“, од пците беше растргнат угледен доктор, а на местото на настанот беше најден вештачки фалус со траги од животинско потекло. Адвокатот (пријател на докторот) што овозможил да му бидат вратени пците на убиениот доктор бил вонбрачен партнер на една важна министерка во левата влада, а нејзин стрико бил вештак во истата афера. Против партнерот, стрикото и уште неколку полицајци, обвинителот води постапки.

Второ, Јанша (Словенска демократска странка) на својата интернет-страница тврди дека пред Бин Ладен постоеше еден уште попознат терорист Шакал, кој бил тајно оружје на УДБА. Цел свет го бара, а тој во Југославија. Интерпол го лоцира во 1976 година. Лично Тито го ставил во заштита. Шакал во своите спомени, кои излегуваат во еден либански весник, наведува дека експлозивот што го ставил на 31.12.1983 на возот Марсеј – Париз, бил југословенски http://www.sds.si/news/5986).

Трето. Во време на претседателствувањето на Јанез Дрновшек, неговиот почесен конзул за Нов Зеланд, Душан Лајовиц, на интернет обеси список на 14.000 кодоши. Дрновшек успеа брзо да го тргне списокот од Интернет. Од април 2010 година, списокот е повторно на Интернет. До денес не е симнат. Опфаќа еден милион имиња. Има од сите поранешни републики. Страницата е:
http://cae-udba.net/. Дава и упатство за употреба: „Кликнете на соодветната мапа со почетната буква (букви) на презимето на лицето што сакате да го побарате во ЦАЕ. Ќе дојдете во мапата во која се зачувани од евиденцијата, распределени според абецеден ред. Бараното лице побарајте го на соодветниот лист“.
Истражувајте и уживајте во „Словенечкиот викиликс“.

Објавено во Нова Македонија на 04 март 2011

  •